Pilates

Manchmol meehnt man jo, man möt unbedingt wat gesundet don. Sport drieben. Blots wat? Dat droff uk jo nich to anstrengend wän. Jogging – is nich god för de Gelenke, Nordic Walking – dor wat de Buk uk nich straffer. Schwemm oder Radförn – dat eene is to natt un bi dat anere droff dat nich regnen. Over dat gifft jo noch —- Pilates.

Jeden Mondag obend inne Turnhall kummt meist all de Fronslü ut Esenshamm tohop. Dor is denn erst een grodet Geschnatter inne Umkleidekobin. Dat sind jo ok so um de twintig Fronslü. Kannst Di woll förstellen, wat dor för een Rabatz is. Denn geiht dat los. Erstmol opwärmen sägt Anke – use Vorturnerin. Dat geihtg jo noch. Een Been hoch, dat annere Been hoch – dat kannst woll utholn. Dann schöllt wi us op den Rurch packen. Uk in Ordnung. Den Buck anspannen un de Morsbacken tohopkniepen. Denn kummt ehr Spruch: Bauchnabel an die Wirbelsäule, Beckenboden fest und die Schulterblätter zum Po! Jo!! Und denn geiht dat so richtig los. Beede Been vonne Eer afheben und oben holen. Un dat ne ganze Tied. Un denn de Arms uk noch. To de glieke Tied! Een Gestöhne inne Turnhall. Kannst woll meenen , een von de Froonslü krieg dor ehr Kind. Endlich sächt Anke denn, dat wi us entspannen köönt. Endlich!!!! Ober denn geiht dat wieter. Op de Siet legen. Uk allns wollen anspannen. Ohje,man markt all siene Muskeln dor, wo man gor keine vermood har! Un denn op den Buck lirgen. Dat geiht gor nich. Und wenn dat allns nich richtig moakst oder wenn nicht mehr so recht kannst, denn kummt Anke und beegt so lang an dine Arms un Beens, bit dat passt. Se is dor nich zimperlich. Wenn se sik so en schwarten Antog antehen wur ut son Gummitüch – Latex oder wi dat het – und koopt sik eene Pietsch, denn kunn se uk woll op de Reeperboahn in Hamburg as „Domina“ ehr Geld verdeenen. Twischendör kiekt man no de Klock. Over de wär woll twei. Jedenfalls krupp de so sinnig vör sik hän. De Stunn geiht eenfach nich vörbi. Wie lang denn noch. Kort vor Ende dröft wi us denn ober noch dehnen und entspannen. Dat wurd ober ok Tied und dat geiht good!!

In de Umkleidekobin gifft dat meist jedetmol een Glas Sekt. Entweder het een Geburtstag oder eenfach nur so.Dat is jedetmol een schöner Afschluss von so een sportlichen Obend.

Von de Übungen hett man ober mennichmol noch twee Dog loater wat von. Wenn nämlich de Muskelkoter dörkomt und di sämtliche Knoken weh dot.

Man schall dat nich glöven – ober dat Pilates deit wirklich god, mokt Spoaß und dat Beste is dat Glas Sekt achteran!